رد الشاعر مبارك أبوظهير
ذكرتني في بدع الامثال لاهنت
بالوافي اللي بالملمات مغوار
وآلمتني وانا وربي تألمت
ذكرتني قوم ٍ حشيمين وأخيار
لاقيل ابو جزاع ينقال وانعمت
قول وفعل ماهي سواليف ثرثار
كريم لامنه عطا يعطي بصمت
صنايعه بالخير في سر وجهار
وإن قيل أبو مطلق تذكرت وانهرت
اللي من فراقه تجرعت الأمرار
أبقى مقصر فيه مهما تكلمت
ريف النشاما مكرم الضيف والجار
واليا طروا عبدالله القحص صفقت
من حر فقده أصفق يمين بيسار
ذيب السرايا من فراقه تحطمت
مو بس أنا تحطموا مثلي كثار
هيضتني في هالتوجد وانا همت
في ذكرهم يابوفهد دارت أفكار
رديتني لأول صباي وتذكرت
وقت ٍ مضى يابوفهد صار تذكار
مير أنت علمني شعلمك تأثرت
توجدك شب بمعاليقي النار
لاتشتكي جور الزمن وأنت عمرت
بقلوبنا حب وحشيمه ومقدار
دونك نذب أرواحنا كانك أشرت
حنا عصاك اليا غدا الوقت غدار
مبارك نايف أبوظهير
ليست هناك تعليقات:
إرسال تعليق